Lea mánáidsuodjalusa bargu veahkehit jus vuollil 18-jahkásaš mánát vásihit dahje sáhttet vásihit veahkaválddi dahje illásteami, vuolledábiid vahágahttima, bággonáitaleami dahje dáid áitagiid. Eará dilálašvuođaovdamearkkat goas mánáidsuodjalus sáhttá veahkehit, lea jus váhnemat gárrejit, dahje go mánás leat duođalaš láhttenváttisvuođat dahje váttisvuođat rihkolašvuođain dahje gárrenmirkkuiguin. Veahkki lea nuvttá.
Veahkkedoaimmat ruovttu ektui sáhttet leat:
- neavvagat ja bagadallan bearrašii
- váhnenjoavkkut
- doarjjaolmmoš
- ekonomalaš doarjja mánáidgárdesadjái
- ekonomalaš doarjja skuvlaastoáigeortnegii (AÁO/AKS)
- ekonomalaš doarjja astoáigedoaimmaide dahje earái
- veahkki vahkkoloahpain dahje galledanruoktu.
“Mánnái buoremussan” lea mearrideaddji mánáidsuodjalusa barggus (geahča Mánáidsuodjaluslága § 4-1. Hensynet til barnets beste). Muhtumin sáhttá dát leat váhnemiid sávaldagaid vuostá. Mánáidsuodjalus galgá veahkehit ja doarjut váhnemiid nu ahte sii sáhttet leat buorit fuollaolbmot iežaset mánáide, ja mánát galget orrut ruovttus jus leaš vejolaš.
Muhtin duođalaš áššiin ii leat mánnái buoremus orrut ruovttus, ja mánáidsuodjalus ferte váldit badjelasas fuolahusa. Dát sáhttá dáhpáhuvvat bearraša sávaldaga vuođul dahje vuostá. Dušše fylkkalávdegoddi, mii lea duopmostuollolágan orgána, sáhttá mearridit mánáidsuodjalusa váldit badjelasas fuolahusa go lea váhnemiid sávaldaga vuostá.
Mánáidsuodjalus galgá veahkehit ja doarjut váhnemiid nu ahte sii sáhttet leat buorit fuollaolbmot iežaset mánáide
Mánáidsuodjalus lea sorjavaš das ahte soames dieđiha mánáid birra geain ii leat buorre dilli, nu ahte mánná ja bearaš ožžot dan veahki maid dárbbašit. Dus lea sihke priváhtaolmmožin ja mánáid- ja nuoraidbargin lágas nannejuvvon geatnegasvuohta dieđihit jus vuorjašuvat.
Mánáidsuodjalusa eanaš bargit leat juogo mánáidsuodjaluspedagogat, sosionomat, juristtat dahje psykologat. Bargiin lea jávohisvuođageasku, ii ge sis leat lohpi earáide juohkit dieđuid du birra du lobi haga, dahje jus lea sáhka heakkas. Mánáidsuodjalus fállá dulkka go lea dárbu dasa.
Buot norgga gielddain lea mánáidsuodjalusbálvalus. Olusiin lea maiddái mánáidsuodjalusfákta. Neahttabáikkis barnevernvakten.no gávnnat bajilgova gielddalaš mánáidsuodjalusbálvalusain ja mánáidsuodjalusfávttain ja eará ávkkálaš dieđuid
> MÁNÁIDSUODJALUS. Mánnái buoremussan
Bajilgovva gielddalaš mánáidsuodjalusbálvalusain ja mánáidsuodjalusfávttain