Maid fállet bearašsuodjaluskantuvrrat?
Bearašsuodjalankantuvrrat fállet nuvttá veahki ja neavvaga báraide ja bearrašiidda geat vásihit váttisvuođaid, riidduid dahje heđiid. Bearašsuodjaluskantuvra bargá earret eará suhtto- ja veahkaváldeváttisvuođaiguin. Muhtun kantuvrrain leat individuálalaš fálaldagat veahkaválddi gillájeddjiide ja/dahje sidjiide geat leat veahkaválddálaččat.
Sáhttibehtet ieža váldit oktavuođa lagamus bearašsuodjaluskantuvrrain diŋgot áiggi dahje oažžut eanet dieđuid movt bearašsuodjalankantuvra sáhttá veahkehit. Go oallugat váldet oktavuođa, de vuoruhuvvojit mánnábearrašat.
Fálaldaga birra
Bearašsuodjaluskantuvrraid fálaldagat leat iešguđetláganat, ja dat sáhttet leat
- bárraterapiija, bearašterapiija
- suhttohálddašankursa ja suhttohálddašanbagadallan váhnemiidda
- soabadeapmi separašuvnna ja earráneami oktavuođas, veahkki váhnenovttasbargui ja ovttastallamii
- váhnenbagadallanprográmmat ja iešguđetlágan ovttaseallinprográmmat
Geahča filmma dan birra movt bearašsuodjalus bargá:
Bargiin lea jávohisvuođageasku
Bearašsuodjaluskantuvrrain barget earret eará psykologat, pedagogat ja sosionomat geain lea gelbbolašvuohta bearašterapiijas. Bargiin lea jávohisvuođageasku, iige sis leat lohpi earáiguin juogadit dieđuid du birra earret go jus don mieđat dahje jus lea sáhka heakkas ja dearvvašvuođas. Jus bearašsuodjaluskantuvra ii sáhte fállat dan veahki maid dii dárbbašehpet, de sáhttet du čujuhit eará sadjái. Bearašsuodjaluskantuvra fállá dulkka go lea dárbu.
Eanas bearašsuodjaluskantuvrrat gullet stáhtii ja leat oassi Mánáid-, nuoraid- ja bearašetáhtas (Bufetat). Earáid bearašsuodjaluskantuvrraid eaiggáduššet girkolaš vuođđudusat, ja sis leat doaibmašiehtadusat Mánáid- nuoraid- ja bearašetáhtain (Bufetat). Fálaldat addojuvvo geavaheddjiide beroškeahttá eallinoainnus ja oskkus.
Oktavuođadieđut
Oza bearašsuodjaluskantuvrraid iežat ássanbáikki lahka dinutvei.no:s (vállje familievern “Type tilbud” vuoldet’)
Bajilgovva bearašsuodjaluskantuvrrain Bearaš-, nuoraid- ja bearašdirektoráhta siidduin