Forlat siden Nasjonal veiviser
ved vold og overgrep

Mii lea Doarjjaguovddáš inseastta ja seksuálalaš illástemiid vuostá (SMISO)?

Guovddážis inseastta ja seksuálalaš illástemiid vuostá sáhtát don gillájeaddjin, oažžut doarjaga gieđahallat iežat vásáhusaid. Guovddáš lea vuosttažettiin iešveahkehanfálaldat ollesolbmuide geat leat gillán inseastta, seksuálalaš illástemiid dahje veahkaválddi, ja sin oapmahaččaide.

Guovddážat leat nuvttá fálaldat ja deavdda almmolaš veahkkeapparáhtii, it ge don dárbbaš sáddejumi váldit oktavuođa.

Fálaldagat leat:

  • ráđđeaddin telefovnna bokte
  • oktagaslaš ságastallamat
  • searvan iešveahkehanjoavkkuide
  • eará fáddájoavkkut
  • kurssat

Fálaldagat sáhttet rievddadit veahá. Guovddážat láhčet iešguđet láhkai dili nu, ahte geavaheaddjit sáhttet plánekeahttá ovttastallat eará geavaheddjiiguin. Geavaheaddjit sáhttet maiddái ieža álggahit ja čađahit iešguđet doaimmaid. Guovddážat leat rahpasat bearrašiidda ja du eará lagašolbmuide, ja muhtun guovddážiin leat fálaldagat mánáide. Dasa lassin doaimmahit guovddážat eastadeaddji bargguid, nugo oahpahallama ja eará čuvgehusbargguid.

 

Guovddážiin sáhtát don deaivvadit earáiguin geat leat vásihan seksuálalaš illástemiid. Guovddáža bargiin lea relevánta oahppu ja/dahje leat ieža vásihan illásteami.

Sáhtát leat anonyma, nappo it dárbbaš muitalit iežat nama go válddát oktavuođa guovddážiin. Bargiin lea jávohisvuođageasku, ii ge sis leat danne lohpi earáide juohkit dieđuid du birra du lobi haga, dahje jus lea sáhka heakkas. Earáin, geat geavahit guovddáža, ii ge leat lohpi muitalit earáide dan maid besset diehtit du birra. Guovddážat fállet dulkka go lea dárbu dasa.

Buot fylkkain leat dál unnimustá okta guovddáš inseastta ja seksuálalaš illástemiid vuostá. Guovddážat ožžot ruđa stáhtas ja gielddas.

Gávdno maiddái birrajándorrabas riikaviidosaš telefovdna inseastagillájeddjiid ja seksuálalaš illástuvvon gillájeddjiid várás. Dán doaimmaha ja bálvala Vestfoldda Incestsenter.


Bajilgovva guovddážiin

Geahča maiddái Riikaviidosaš telefovdna – Birrajándorrabas telefovdna inseastagillájeddjiid ja seksuálalaš illástuvvon gillájeddjiid ja sin oapmahaččaid várás, nuvttá nummar: 800 57 000